ajib insan hai mere sare purane KHat ko jala raha hai

'ajīb insāñ hai mere saare purāne ḳhat ko jalā rahā hai

vafā mohabbat fuzūl shai hai ye baat sab ko batā rahā hai

tazād us kā mirā hai qaa.em añdherā aur raushnī ke bā'is

idhar diyā maiñ jalā rahā huuñ udhar diyā vo bujhā rahā hai

taḌap rahā huuñ kisī kī ḳhātir ye hālat-e-dil se sab 'ayāñ hai

kisī kī āñkheñ kisī kī palkeñ kisī kā chehra satā rahā hai

ḳhayāl-e-bāda-kashī meñ koī chalā to aaya thā mai-kade meñ

magar ye ab kyā huā ki āḳhir yahāñ bhī dāman bachā rahā hai

dar-asl mash.hūr vo huā hai to is meñ merā bhī hai ta'āruf

mirī hī likkhī tamām ġhazleñ mushā’iron meñ sunā rahā hai

vo mere dil kā sukūn Thahrā vo mere dil kā qarār Thahrā

jo duur se dekhtā huuñ us ko to lagtā hai muskurā rahā hai

'ajib insan hai mere sare purane KHat ko jala raha hai

wafa mohabbat fuzul shai hai ye baat sab ko bata raha hai

tazad us ka mera hai qaem andhera aur raushni ke ba'is

idhar diya main jala raha hun udhar diya wo bujha raha hai

taDap raha hun kisi ki KHatir ye haalat-e-dil se sab 'ayan hai

kisi ki aankhen kisi ki palken kisi ka chehra sata raha hai

KHayal-e-baada-kashi mein koi chala to aaya tha mai-kade mein

magar ye ab kya hua ki aaKHir yahan bhi daman bacha raha hai

dar-asl mashhur wo hua hai to is mein mera bhi hai ta'aruf

meri hi likkhi tamam ghazlen musha’iron mein suna raha hai

wo mere dil ka sukun Thahra wo mere dil ka qarar Thahra

jo dur se dekhta hun us ko to lagta hai muskura raha hai