ajib KHwab tha hum bagh mein khaDe hue the

ajiib ḳhvāb thā ham baaġh meñ khaḌe hue the

hamāre sāmne phūloñ ke sar paḌe hue the

barahna titliyāñ raqsāñ thiiñ uryāñ shāḳhoñ par

zamīñ meñ saare shajar sharm se gaḌe hue the

tamām paat the niile buzurg bargad ke

usī ko Dasne se sāñpoñ ke phan baḌe hue the

za.iif peḌ the būḌhī havā se sharminda

javāñ parinde kisī baat par aḌe hue the

na koī naġhma-e-bulbul na koī naġhma-e-gul

ḳhudā-e-sub.h se sab ḳhush-gulū laḌe hue the

vahīñ pe sāmne 'vāsif' thā ek qabristāñ

jahāñ yahāñ vahāñ sab nāmvar saḌe hue the

phir ek qabr huī shaq to us meñ the do dil

aur un diloñ meñ mohabbat ke nag jaḌe hue the

ajib KHwab tha hum bagh mein khaDe hue the

hamare samne phulon ke sar paDe hue the

barahna titliyan raqsan thin uryan shaKHon par

zamin mein sare shajar sharm se gaDe hue the

tamam pat the nile buzurg bargad ke

usi ko Dasne se sanpon ke phan baDe hue the

zaif peD the buDhi hawa se sharminda

jawan parinde kisi baat par aDe hue the

na koi naghma-e-bulbul na koi naghma-e-gul

KHuda-e-subh se sab KHush-gulu laDe hue the

wahin pe samne 'wasif' tha ek qabristan

jahan yahan wahan sab namwar saDe hue the

phir ek qabr hui shaq to us mein the do dil

aur un dilon mein mohabbat ke nag jaDe hue the