ajib lutf mohabbat ki dastan mein hai

ajiib lutf mohabbat kī dāstān meñ hai

vafā kā tazkira duniyā kī har zabān meñ hai

na vo zamīñ pe kahīñ hai na āsmān meñ hai

parinda is liye mahfūz hai uḌaan meñ hai

nashāt-e-sāya ne ma.azūr kar diyā us ko

vo kaise dhuup meñ nikle jo sā.ebān meñ hai

nasīb dekhiye mālik to ho gayā be-ghar

kirāya-dār abhī tak usī makān meñ hai

ḳhulūs-o-mehr-o-vafā kī nahīñ koī qīmat

vo maal biktā nahīñ jo mirī dūkān meñ hai

fulāñ kī baat fulāñ ne sunī fulāñ se kahī

bas itnī baat pe hangāma ḳhāndān meñ hai

'zafar' batā to sahī kyoñ hai itnī be-ḳhabarī

dimāġh kaun se dil kaun se jahān meñ hai

ajib lutf mohabbat ki dastan mein hai

wafa ka tazkira duniya ki har zaban mein hai

na wo zamin pe kahin hai na aasman mein hai

parinda is liye mahfuz hai uDan mein hai

nashat-e-saya ne mazur kar diya us ko

wo kaise dhup mein nikle jo saeban mein hai

nasib dekhiye malik to ho gaya be-ghar

kiraya-dar abhi tak usi makan mein hai

KHulus-o-mehr-o-wafa ki nahin koi qimat

wo mal bikta nahin jo meri dukan mein hai

fulan ki baat fulan ne suni fulan se kahi

bas itni baat pe hangama KHandan mein hai

'zafar' bata to sahi kyon hai itni be-KHabari

dimagh kaun se dil kaun se jahan mein hai