ajib shahr ka manzar hai kya kiya jae

ajiib shahr kā manzar hai kyā kiyā jaa.e

har ek haath meñ ḳhanjar hai kyā kiyā jaa.e

fazā chaman kī mo.attar hai kyā kiyā jaa.e

baḌā hasīn ye manzar hai kyā kiyā jaa.e

jo raah par thā vahī ban gayā hai ab rahzan

yahī to vaqt kā ham-sar hai kyā kiyā jaa.e

kisī ko aish-o-tarab aur kisī ko dar kī bhiik

ye apnā apnā muqaddar hai kyā kiyā jaa.e

sanam-kade kā musavvir bhī aaj hairāñ hai

yahāñ har aadmī aazar hai kyā kiyā jaa.e

ab apne shahr meñ jiinā bhī ho gayā mushkil

yahāñ har ek fusūñ-gar hai kyā kiyā jaa.e

tamām umr kaTī jis kī rahzanī meñ 'shād'

vahī to aaj kā rahbar hai kyā kiyā jaa.e

ajib shahr ka manzar hai kya kiya jae

har ek hath mein KHanjar hai kya kiya jae

faza chaman ki moattar hai kya kiya jae

baDa hasin ye manzar hai kya kiya jae

jo rah par tha wahi ban gaya hai ab rahzan

yahi to waqt ka ham-sar hai kya kiya jae

kisi ko aish-o-tarab aur kisi ko dar ki bhik

ye apna apna muqaddar hai kya kiya jae

sanam-kade ka musawwir bhi aaj hairan hai

yahan har aadmi aazar hai kya kiya jae

ab apne shahr mein jina bhi ho gaya mushkil

yahan har ek fusun-gar hai kya kiya jae

tamam umr kaTi jis ki rahzani mein 'shad'

wahi to aaj ka rahbar hai kya kiya jae