ajib shai hai tarah-dar bhi tamanna bhi

ajiib shai hai tarah-dār bhī tamannā bhī

raqīb-e-jāñ bhī hai qātil bhī hai masīhā bhī

udaas udaas harīm-e-nigāh be-manzar

dhuāñ dhuāñ ḳhalish-e-rā.egāñ se duniyā bhī

dil-o-dimāġh-o-nafas tishnagī se haiñ raushan

isī kī aag meñ jalte haiñ shahar-o-sahrā bhī

vahī havā-e-jahāñ-tāb mo'atabar hai ki jo

jilā ke chhoḌ ga.ī hai charāġh-e-fardā bhī

talab meñ mujh se to lamha bhī ik nahīñ kaTtā

isī ḳhumār ne kaaTe haiñ koh-o-dariyā bhī

tire ḳhayāl se ḳhalvat bhī anjuman hai mujhe

tire ḳhayāl se hoñ anjuman meñ tanhā bhī

fazā-e-ḳhvāb-e-tarab ne jagā diyā mujh ko

lagī jo aañkh to hone lagā saverā bhī

ajib shai hai tarah-dar bhi tamanna bhi

raqib-e-jaan bhi hai qatil bhi hai masiha bhi

udas udas harim-e-nigah be-manzar

dhuan dhuan KHalish-e-raegan se duniya bhi

dil-o-dimagh-o-nafas tishnagi se hain raushan

isi ki aag mein jalte hain shahar-o-sahra bhi

wahi hawa-e-jahan-tab mo'atabar hai ki jo

jila ke chhoD gai hai charagh-e-farda bhi

talab mein mujh se to lamha bhi ek nahin kaTta

isi KHumar ne kaTe hain koh-o-dariya bhi

tere KHayal se KHalwat bhi anjuman hai mujhe

tere KHayal se hon anjuman mein tanha bhi

faza-e-KHwab-e-tarab ne jaga diya mujh ko

lagi jo aankh to hone laga sawera bhi