ajib tarh ka mausam raha hai aankhon mein

'ajīb tarh kā mausam rahā hai āñkhoñ meñ

badan kā saarā lahū jam rahā hai āñkhoñ meñ

koī bhī zaḳhm ho rone se halkā hotā hai

har ek zaḳhm kā marham rahā hai āñkhoñ meñ

ye panchhī apnā nasheman badaltā rahtā hai

kabhī to dil meñ kabhī ġham rahā hai āñkhoñ meñ

maiñ āñsuoñ ko tabarruk samajh ke piitā huuñ

chhupā huā kahīñ zamzam rahā hai āñkhoñ meñ

'ajab nahīñ hai ki kal bāñdh TuuT hī jaa.e

abhī to sail-e-balā tham rahā hai āñkhoñ meñ

kisī kī diid kā lamha guzar chukā kab kā

abhī bhī jashn kā 'ālam rahā hai āñkhoñ meñ

jo dil meñ ho vo hamesha dikhā.ī detā hai

vo duur rah ke bhī paiham rahā hai āñkhoñ meñ

dikhā.ī detī hai har shai mujhe hasīn 'kamāl'

kisī ke husn kā album rahā hai āñkhoñ meñ

'ajib tarh ka mausam raha hai aankhon mein

badan ka sara lahu jam raha hai aankhon mein

koi bhi zaKHm ho rone se halka hota hai

har ek zaKHm ka marham raha hai aankhon mein

ye panchhi apna nasheman badalta rahta hai

kabhi to dil mein kabhi gham raha hai aankhon mein

main aansuon ko tabarruk samajh ke pita hun

chhupa hua kahin zamzam raha hai aankhon mein

'ajab nahin hai ki kal bandh TuT hi jae

abhi to sail-e-bala tham raha hai aankhon mein

kisi ki did ka lamha guzar chuka kab ka

abhi bhi jashn ka 'alam raha hai aankhon mein

jo dil mein ho wo hamesha dikhai deta hai

wo dur rah ke bhi paiham raha hai aankhon mein

dikhai deti hai har shai mujhe hasin 'kamal'

kisi ke husn ka album raha hai aankhon mein