ajnabi shahr mein pahunchun to shanasa dekhun

ajnabī shahr meñ pahuñchūñ to shanāsā dekhūñ

dūsrā koī nahīñ bas tirā chehra dekhūñ

har taraf ek sā manzar nazar aatā hai mujhe

dasht-o-sahrā kī taraf jā.ūñ ki dariyā dekhūñ

apne chehre kī bhī pahchān hai mushkil ab to

aa.ina le ke jo dekhūñ to bhalā kyā dekhūñ

ghar kī raunaq to uThā le gayā jaane vaalā

kyoñ na bikhre hue lamhoñ kā asāsa dekhūñ

mere andar bhī sulagte hue lamhoñ kī sadā

tere chehre pe bhī bahtā huā dariyā dekhūñ

dil ye kahtā hai kisī roz tū aa.egā zarūr

yahī behtar hai tirā baiTh ke rasta dekhūñ

mujh ko har sher tirī yaad dilā.e 'ḳhālid'

apnī ġhazloñ meñ tire dard kā qissa dekhūñ

ajnabi shahr mein pahunchun to shanasa dekhun

dusra koi nahin bas tera chehra dekhun

har taraf ek sa manzar nazar aata hai mujhe

dasht-o-sahra ki taraf jaun ki dariya dekhun

apne chehre ki bhi pahchan hai mushkil ab to

aaina le ke jo dekhun to bhala kya dekhun

ghar ki raunaq to uTha le gaya jaane wala

kyon na bikhre hue lamhon ka asasa dekhun

mere andar bhi sulagte hue lamhon ki sada

tere chehre pe bhi bahta hua dariya dekhun

dil ye kahta hai kisi roz tu aaega zarur

yahi behtar hai tera baiTh ke rasta dekhun

mujh ko har sher teri yaad dilae 'KHalid'

apni ghazlon mein tere dard ka qissa dekhun