ajnabi Thahra alag Thahra hun tanha Thahra

ajnabī Thahrā alag Thahrā huuñ tanhā Thahrā

maiñ zabāñ rakh ke bhī is shahr meñ gūñgā Thahrā

aap kī bazm meñ jaanā na kisī ne mujh ko

yuuñ to kahne ko har ik fard shanāsā Thahrā

kis ko mā'lūm ki kab phūñk de ye dāman-e-dil

ashk hai yā koī palkoñ pe hai sho'la Thahrā

mujh se milte hī nahīñ husn kī daulat vaale

maiñ hasīnoñ kī nigāhoñ meñ luTerā Thahrā

ab ke sailāb meñ har gaañv huā hai ġharqāb

merā mahfūz ye kāġhaz kā gharauñdā Thahrā

jism kā mere badaltā huā mausam 'afsar'

jaise maiñ shāḳh kā TuuTā huā patta Thahrā

ajnabi Thahra alag Thahra hun tanha Thahra

main zaban rakh ke bhi is shahr mein gunga Thahra

aap ki bazm mein jaana na kisi ne mujh ko

yun to kahne ko har ek fard shanasa Thahra

kis ko ma'lum ki kab phunk de ye daman-e-dil

ashk hai ya koi palkon pe hai sho'la Thahra

mujh se milte hi nahin husn ki daulat wale

main hasinon ki nigahon mein luTera Thahra

ab ke sailab mein har ganw hua hai gharqab

mera mahfuz ye kaghaz ka gharaunda Thahra

jism ka mere badalta hua mausam 'afsar'

jaise main shaKH ka TuTa hua patta Thahra