akasr tanhai se mil kar roe hain

akasr tanhā.ī se mil kar ro.e haiñ

ham ne apne ashk aag se dho.e haiñ

bahut nibhā.ī len-den kī rasmeñ bhī

kuchh aañsū paa.e haiñ kuchh ġham kho.e haiñ

jab bhī bārish ne miTTī se muñh moḌā

jalte sūraj ne zarrāt bhigo.e haiñ

ḳhabar jahāñ miltī hai apne hone kī

ham us manzil par bhī kho.e kho.e haiñ

jab ḳhud ko paanā hī mushkil kaam huā

kyuuñ kachche dhāge meñ phuul piro.e haiñ

bāl-o-par paate hī uḌe havāoñ meñ

ham ne jo nazdīk ke rishte Dho.e haiñ

tum ko kyā mālūm mirī tanhā.ī ne

lafzoñ meñ apne jazbāt samo.e haiñ

ham kyā jāneñ ḳhvāboñ kī narmī kyā hai

ham kab ḳhushbū kī bāñhoñ meñ so.e haiñ

bahā na le jaa.e un ko bārish 'ūshā'

chaTTānoñ par ḳhvāb vafā ke bo.e haiñ

akasr tanhai se mil kar roe hain

hum ne apne ashk aag se dhoe hain

bahut nibhai len-den ki rasmen bhi

kuchh aansu pae hain kuchh gham khoe hain

jab bhi barish ne miTTi se munh moDa

jalte suraj ne zarraat bhigoe hain

KHabar jahan milti hai apne hone ki

hum us manzil par bhi khoe khoe hain

jab KHud ko pana hi mushkil kaam hua

kyun kachche dhage mein phul piroe hain

baal-o-par pate hi uDe hawaon mein

hum ne jo nazdik ke rishte Dhoe hain

tum ko kya malum meri tanhai ne

lafzon mein apne jazbaat samoe hain

hum kya jaanen KHwabon ki narmi kya hai

hum kab KHushbu ki banhon mein soe hain

baha na le jae un ko barish 'usha'

chaTTanon par KHwab wafa ke boe hain