akela ghar hai kyon rahte ho kya deti hain diwaren

akelā ghar hai kyoñ rahte ho kyā detī haiñ dīvāreñ

yahāñ to hañsne vāloñ ko rulā detī haiñ dīvāreñ

inheñ bhī apnī tanhā.ī kā jab ehsās hotā hai

to gahrī niiñd se mujh ko jagā detī haiñ dīvāreñ

bujhe maazī kā khilte haal se rishta ajab dekhā

khañDar ḳhāmosh haiñ lekin sadā detī haiñ dīvāreñ

havā ke zaḳhm sah kar bārishoñ kī choT khā khā kar

chhatoñ ko rauzanoñ ko aasrā detī haiñ dīvāreñ

rahūñ ghar meñ to mere sar pe chādar taan detī haiñ

safar par jab nikaltā huuñ duā detī haiñ dīvāreñ

jo chalnā hī na chāhe rok lete haiñ use zarre

bagūloñ ko safar meñ rāsta detī haiñ dīvāreñ

vo saarī guftugū jo band kamroñ hī meñ hotī hai

maiñ jab bāhar se aatā huuñ sunā detī haiñ dīvāreñ

utartī aur chaḌhtī dhuup kī pahchān hai in ko

abhī din kitnā baaqī hai batā detī haiñ dīvāreñ

'matīn' is chilchilātī dhuup meñ saaya inhī se hai

maiñ jab bhī TūTtā huuñ hausla detī haiñ dīvāreñ

akela ghar hai kyon rahte ho kya deti hain diwaren

yahan to hansne walon ko rula deti hain diwaren

inhen bhi apni tanhai ka jab ehsas hota hai

to gahri nind se mujh ko jaga deti hain diwaren

bujhe mazi ka khilte haal se rishta ajab dekha

khanDar KHamosh hain lekin sada deti hain diwaren

hawa ke zaKHm sah kar barishon ki choT kha kha kar

chhaton ko rauzanon ko aasra deti hain diwaren

rahun ghar mein to mere sar pe chadar tan deti hain

safar par jab nikalta hun dua deti hain diwaren

jo chalna hi na chahe rok lete hain use zarre

bagulon ko safar mein rasta deti hain diwaren

wo sari guftugu jo band kamron hi mein hoti hai

main jab bahar se aata hun suna deti hain diwaren

utarti aur chaDhti dhup ki pahchan hai in ko

abhi din kitna baqi hai bata deti hain diwaren

'matin' is chilchilati dhup mein saya inhi se hai

main jab bhi TuTta hun hausla deti hain diwaren