akeli raat thi chaaron taraf andhera tha

akelī raat thī chāroñ taraf añdherā thā

aur ek peḌ se merā hī haath niklā thā

ajiib dhun thī ki baḌhte hī jā rahe the qadam

har ik taraf se mujhe āñdhiy.oñ ne gherā thā

nazar to aa.e the ham ko bhī paañv uThte hue

phir is ke baad bahut duur tak añdherā thā

bikhar rahe the añdhere hamāre sar pe magar

ufuq se tā-ba-ufuq chāñdnī kā Derā thā

mere ḳhayāl meñ aa kar nikal gayā vo rang

jo āsmāñ pe harā aur zamīñ pe niilā thā

sabhī kī uñgliyāñ uTThī thiiñ bas mirī jānib

na jaane maiñ ne ye kis kā libās pahnā thā

chamak rahe the sitāre jahāñ-jahāñ 'ajmal'

vahīñ vahīñ pe zarā āsmān gahrā thā

akeli raat thi chaaron taraf andhera tha

aur ek peD se mera hi hath nikla tha

ajib dhun thi ki baDhte hi ja rahe the qadam

har ek taraf se mujhe aandhiyon ne ghera tha

nazar to aae the hum ko bhi panw uThte hue

phir is ke baad bahut dur tak andhera tha

bikhar rahe the andhere hamare sar pe magar

ufuq se ta-ba-ufuq chandni ka Dera tha

mere KHayal mein aa kar nikal gaya wo rang

jo aasman pe hara aur zamin pe nila tha

sabhi ki ungliyan uTThi thin bas meri jaanib

na jaane main ne ye kis ka libas pahna tha

chamak rahe the sitare jahan-jahan 'ajmal'

wahin wahin pe zara aasman gahra tha