aks aaina-KHana se alag rakkha hai

aks ā.īna-ḳhāna se alag rakkhā hai

vahshat-e-zāt ko sahrā se alag rakkhā hai

ḳhud ko maiñ ḳhud se bhī milne nahīñ detā hargiz

apnī duniyā ko bhī duniyā se alag rakkhā hai

maiñ kahāñ sā.at-e-imroz meñ rahne vaalā

maiñ ne har roz ko fardā se alag rakkhā hai

do mahāzoñ pe abhī ma.arka-ārā.ī hai

ḳhema-e-sabr ko dajla se alag rakkhā hai

ḳhushk mashkīza-e-hulqūm kī nigarānī meñ

pyaas ke ḳhitte ko dariyā se alag rakkhā hai

vo to kahtā hai tirī zaat meñ zam huuñ lekin

us ne bhī ḳhud ko bas ik lā se alag rakkhā hai

kitnā āsān hai ye jāda-e-dushvār bhī ab

apnā har naqsh kaf-e-pā se alag rakkhā hai

maiñ 'yagānā' kā taraf-dār nahīñ huuñ 'shāhid'

is liye miir ko mirzā se alag rakkhā hai

aks aaina-KHana se alag rakkha hai

wahshat-e-zat ko sahra se alag rakkha hai

KHud ko main KHud se bhi milne nahin deta hargiz

apni duniya ko bhi duniya se alag rakkha hai

main kahan saat-e-imroz mein rahne wala

main ne har roz ko farda se alag rakkha hai

do mahazon pe abhi marka-arai hai

KHema-e-sabr ko dajla se alag rakkha hai

KHushk mashkiza-e-hulqum ki nigarani mein

pyas ke KHitte ko dariya se alag rakkha hai

wo to kahta hai teri zat mein zam hun lekin

us ne bhi KHud ko bas ek la se alag rakkha hai

kitna aasan hai ye jada-e-dushwar bhi ab

apna har naqsh kaf-e-pa se alag rakkha hai

main 'yagana' ka taraf-dar nahin hun 'shahid'

is liye mir ko mirza se alag rakkha hai