aks-dar-aks hai chehron ki numudari se

aks-dar-aks hai chehroñ kī numūdārī se

aa.ina dekhte haiñ log bhī be-zārī se

phir bhī ilzām ka.ī aa ga.e sar par apne

maiñ gurezāñ to rahā vaqt kī ayyārī se

buġhz hai hirs hai ġhībat hai riyā-kārī hai

jis qadar bhī ho raho duur hī bīmārī se

baT ke rah jaatā hai insān ka.ī hissoñ meñ

mashġhale paidā ajab hote haiñ bekārī se

be-sabab girtā nahīñ aadmī nazroñ se kabhī

bad-kalāmī ke sabab yā kabhī makkārī se

nā-mukammal hai ġhazal ġham kī mahārat ke baġhair

husn aatā hai kahāñ sheroñ meñ fankārī se

log girvīda mire yūñhī nahīñ aaj 'latīf'

dil ko jiitā hai ravābit se ravā-dārī se

aks-dar-aks hai chehron ki numudari se

aaina dekhte hain log bhi be-zari se

phir bhi ilzam kai aa gae sar par apne

main gurezan to raha waqt ki ayyari se

bughz hai hirs hai ghibat hai riya-kari hai

jis qadar bhi ho raho dur hi bimari se

baT ke rah jata hai insan kai hisson mein

mashghale paida ajab hote hain bekari se

be-sabab girta nahin aadmi nazron se kabhi

bad-kalami ke sabab ya kabhi makkari se

na-mukammal hai ghazal gham ki mahaarat ke baghair

husn aata hai kahan sheron mein fankari se

log girwida mere yunhi nahin aaj 'latif'

dil ko jita hai rawabit se rawa-dari se