aks-e-nairangi-e-jahan hain hum

aks-e-nairangi-e-jahāñ haiñ ham

ek be-rabt dāstāñ haiñ ham

kar diyā gum tirī nigāhoñ ne

terī mahfil meñ ab kahāñ haiñ ham

husn-e-zan phir kisī se kyā rakkheñ

apne saaya se bad-gumāñ haiñ ham

rāt-din nit na.e haiñ andeshe

aur un sab ke darmiyāñ haiñ ham

kuchh jo hote to phir ḳhudā hote

kuchh na ho kar bhī ik jahāñ haiñ ham

ye na samjhe fareb-e-hastī meñ

phir adam kī taraf ravāñ haiñ ham

aa bhī jaao ki puurī ho jaa.e

nā-mukammal sī dāstāñ haiñ ham

ātish-e-shauq sard hai 'navvāb'

the kabhī sho.ala ab dhuāñ haiñ ham

aks-e-nairangi-e-jahan hain hum

ek be-rabt dastan hain hum

kar diya gum teri nigahon ne

teri mahfil mein ab kahan hain hum

husn-e-zan phir kisi se kya rakkhen

apne saya se bad-guman hain hum

raat-din nit nae hain andeshe

aur un sab ke darmiyan hain hum

kuchh jo hote to phir KHuda hote

kuchh na ho kar bhi ek jahan hain hum

ye na samjhe fareb-e-hasti mein

phir adam ki taraf rawan hain hum

aa bhi jao ki puri ho jae

na-mukammal si dastan hain hum

aatish-e-shauq sard hai 'nawwab'

the kabhi shoala ab dhuan hain hum