aks-e-raushan tera aaina-e-jaan mein rakkha

aks-e-raushan tirā ā.īna-e-jāñ meñ rakkhā

ham ne tasvīr ko hairat ke jahāñ meñ rakkhā

kaun māyūs tirī bazm-e-ināyat se uThā

tere ikrām ne kis kis ko gumāñ meñ rakkhā

koī mad.hosh na ho sā.at-e-gul-bosī meñ

us ne yuuñ phuul ko kāñToñ kī amaañ meñ rakkhā

vo samajhtā thā ki haiñ sach ke ḳharīdār bahut

rah gayā maal sabhī us kī dukāñ meñ rakkhā

yaad ham aa na sake jashn-e-bahārāñ meñ use

ham-safar jis ne hameñ ahd-e-ḳhizāñ meñ rakkhā

ik parinda bhī nahīñ peḌ pe baaqī 'gulzār'

tiir sayyād ne kis vaqt kamāñ meñ rakkhā

aks-e-raushan tera aaina-e-jaan mein rakkha

hum ne taswir ko hairat ke jahan mein rakkha

kaun mayus teri bazm-e-inayat se uTha

tere ikram ne kis kis ko guman mein rakkha

koi madhosh na ho saat-e-gul-bosi mein

us ne yun phul ko kanTon ki aman mein rakkha

wo samajhta tha ki hain sach ke KHaridar bahut

rah gaya mal sabhi us ki dukan mein rakkha

yaad hum aa na sake jashn-e-bahaaran mein use

ham-safar jis ne hamein ahd-e-KHizan mein rakkha

ek parinda bhi nahin peD pe baqi 'gulzar'

tir sayyaad ne kis waqt kaman mein rakkha