aks kya dida-e-tar mein dekha

aks kyā dīda-e-tar meñ dekhā

ham ne dariyā ko bhañvar meñ dekhā

sar-e-manzil koī manzil na milī

ik safar aur safar meñ dekhā

nazar aayā kabhī bāzār meñ ghar

kabhī rasta koī ghar meñ dekhā

suraḳh-rū jañg se lauT aayā thā

ḳhuuñ meñ lat-pat jise ghar meñ dekhā

jaane kab aa ke yahāñ baiThe the

apnā saayā bhī shajar meñ dekhā

ab bhī chipkā hai mirī āñkhoñ meñ

jo dhuāñ sham.a sahar meñ dekhā

aag kis des lagī hai ab ke

phir dhuāñ apne nagar meñ dekhā

ek hī jast meñ ham ne 'hamdam'

fāsla dasht se dar meñ dekhā

aks kya dida-e-tar mein dekha

hum ne dariya ko bhanwar mein dekha

sar-e-manzil koi manzil na mili

ek safar aur safar mein dekha

nazar aaya kabhi bazar mein ghar

kabhi rasta koi ghar mein dekha

suraKH-ru jang se lauT aaya tha

KHun mein lat-pat jise ghar mein dekha

jaane kab aa ke yahan baiThe the

apna saya bhi shajar mein dekha

ab bhi chipka hai meri aankhon mein

jo dhuan shama sahar mein dekha

aag kis des lagi hai ab ke

phir dhuan apne nagar mein dekha

ek hi jast mein hum ne 'hamdam'

fasla dasht se dar mein dekha