aks mahbub ka aaya jo nazar pani mein

aks mahbūb kā aaya jo nazar paanī meñ

yuuñ lagā jaise utar aaya qamar paanī meñ

ghol kar zahr vo dete haiñ agar paanī meñ

aur baḌhtā hai mohabbat kā asar paanī meñ

roz paanī pe banātā huuñ maiñ us kī tasvīr

aate haiñ ziist ke āsār nazar paanī meñ

aisā manzil ke qarīñ TuuT ke barsā bādal

āḳhirash Duub ga.ī rāhguzar paanī meñ

mire ashkoñ se na dāman tirā jal jaa.e kahīñ

suntā aaya huuñ ki hotā hai sharar paanī meñ

umr bhar yūñhī maiñ tūfān-e-balā se khelā

shaam paanī meñ kaTī aur sahar paanī meñ

harf aa jā.egā tum par bhī yaqīnan lahro

Duub kar mar gayā dīvāna agar paanī meñ

kyoñ na pī luuñ ise chhū kar ye tire lab aaya

ho gayā hogā tire lab kā asar paanī meñ

mujh ko sab rok rahe the sar-e-sāhil 'hairat'

maiñ to kartā hī rahā apnā safar paanī meñ

aks mahbub ka aaya jo nazar pani mein

yun laga jaise utar aaya qamar pani mein

ghol kar zahr wo dete hain agar pani mein

aur baDhta hai mohabbat ka asar pani mein

roz pani pe banata hun main us ki taswir

aate hain zist ke aasar nazar pani mein

aisa manzil ke qarin TuT ke barsa baadal

aaKHirash Dub gai rahguzar pani mein

mere ashkon se na daman tera jal jae kahin

sunta aaya hun ki hota hai sharar pani mein

umr bhar yunhi main tufan-e-bala se khela

sham pani mein kaTi aur sahar pani mein

harf aa jaega tum par bhi yaqinan lahro

Dub kar mar gaya diwana agar pani mein

kyon na pi lun ise chhu kar ye tere lab aaya

ho gaya hoga tere lab ka asar pani mein

mujh ko sab rok rahe the sar-e-sahil 'hairat'

main to karta hi raha apna safar pani mein