aksar ye sochta hun main kam-nazar nahin hun

aksar ye sochtā huuñ maiñ kam-nazar nahīñ huuñ

ḳhalvat-guzīñ huuñ garche par be-ḳhabar nahīñ huuñ

mujh ko sañbhālne kī zahmat vo kyoñ uThātā

maiñ sang-e-rahguzar huuñ lā'l-o-gauhar nahīñ huuñ

rūdād likh rahā huuñ ujḌe hue chaman kī

hassās aadmī huuñ maiñ sang-e-dar nahīñ huuñ

bā'd-e-ḳhudā bashar kī tauhīd kā huuñ qaa.il

insāñ ke munkiroñ kā maiñ ham-safar nahīñ huuñ

fikr-e-hayāt jab hai mere suḳhan meñ pinhāñ

phir kyoñ kahūñ suḳhanvar maiñ mo'tabar nahīñ huuñ

TukḌoñ meñ baT gayā huuñ is 'ishq-o-'āshiqī meñ

ab apne saath bhī maiñ shām-o-sahar nahīñ huuñ

'jā'far' qalam uThā kar ye sochtā huuñ aksar

is teġh-e-bā-asar se maiñ be-asar nahīñ huuñ

aksar ye sochta hun main kam-nazar nahin hun

KHalwat-guzin hun garche par be-KHabar nahin hun

mujh ko sanbhaalne ki zahmat wo kyon uThata

main sang-e-rahguzar hun la'l-o-gauhar nahin hun

rudad likh raha hun ujDe hue chaman ki

hassas aadmi hun main sang-e-dar nahin hun

ba'd-e-KHuda bashar ki tauhid ka hun qail

insan ke munkiron ka main ham-safar nahin hun

fikr-e-hayat jab hai mere suKHan mein pinhan

phir kyon kahun suKHanwar main mo'tabar nahin hun

TukDon mein baT gaya hun is 'ishq-o-'ashiqi mein

ab apne sath bhi main sham-o-sahar nahin hun

'ja'far' qalam uTha kar ye sochta hun aksar

is tegh-e-ba-asar se main be-asar nahin hun