alawa jalwa-e-mani ke kul jahan dekha

alāva jalva-e-ma.anī ke kul jahāñ dekhā

jo chiiz dekhne kī thī use kahāñ dekhā

chhupā.e rakhā hamesha nigāh-e-gulchīñ se

na dekhne kī tarah sū-e-āshiyāñ dekhā

ye yaad hai ki mulāqāt to huī thī kahīñ

magar ye yaad nahīñ hai tumheñ kahāñ dekhā

qafas meñ niiñd bhī kaise fareb detī hai

khulī jo aañkh to gulshan na āshiyāñ dekhā

zamīñ ke zulm bhī bardāsht ham ne hañs ke kiye

tirā bhī dabdaba ai jaur-e-āsmāñ dekhā

hazāroñ zaḳhm the insāniyat kī mayyat par

tamām dāman-e-fitrat ko ḳhūñ-chakāñ dekhā

jo log hifz zabāñ kī zabān dete the

to 'qaisar' un ko hī ġhārat-gar-e-zabāñ dekhā

alawa jalwa-e-mani ke kul jahan dekha

jo chiz dekhne ki thi use kahan dekha

chhupae rakha hamesha nigah-e-gulchin se

na dekhne ki tarah su-e-ashiyan dekha

ye yaad hai ki mulaqat to hui thi kahin

magar ye yaad nahin hai tumhein kahan dekha

qafas mein nind bhi kaise fareb deti hai

khuli jo aankh to gulshan na aashiyan dekha

zamin ke zulm bhi bardasht hum ne hans ke kiye

tera bhi dabdaba ai jaur-e-asman dekha

hazaron zaKHm the insaniyat ki mayyat par

tamam daman-e-fitrat ko KHun-chakan dekha

jo log hifz zaban ki zaban dete the

to 'qaisar' un ko hi ghaarat-gar-e-zaban dekha