alag har ek fasane se hai tamhid-e-bayan meri

alag har ik fasāne se hai tamhīd-e-bayāñ merī

zamāna muskurā detā hai sun kar dāstāñ merī

shamīm-e-jiddat-e-mafhūm hai tarz-e-bayāñ merī

mufakkir ban ke mahkegī chaman meñ dāstāñ merī

yaqīñ kī had se bāhar ho chuke haiñ aap ke va.ade

idhar kuchh aur ban jaane ko haiñ ḳhāmoshiyāñ merī

junūñ ne to uḌā diiñ dhajjiyāñ jaib-o-garebāñ kī

magar jaib-o-garebāñ ne uḌā diiñ dhajjiyāñ merī

yaqīnan tū hī phuñk jā.egī bijlī muñh agar moḌā

harīf-e-barq ban jā.egī shāḳh-e-āshiyāñ merī

mazāq-e-dīd baḳhshā to shu.ūr-e-dīd bhī baḳhsho

tumheñ dekhūñgā maiñ kaise nazar aisī kahāñ merī

mujhī par tanz kartī hai mirī be-chārgī 'māhir'

ki ab to āḳhirī manzil meñ hai umr-e-ravāñ merī

alag har ek fasane se hai tamhid-e-bayan meri

zamana muskura deta hai sun kar dastan meri

shamim-e-jiddat-e-mafhum hai tarz-e-bayan meri

mufakkir ban ke mahkegi chaman mein dastan meri

yaqin ki had se bahar ho chuke hain aap ke wade

idhar kuchh aur ban jaane ko hain KHamoshiyan meri

junun ne to uDa din dhajjiyan jaib-o-gareban ki

magar jaib-o-gareban ne uDa din dhajjiyan meri

yaqinan tu hi phunk jaegi bijli munh agar moDa

harif-e-barq ban jaegi shaKH-e-ashiyan meri

mazaq-e-did baKHsha to shuur-e-did bhi baKHsho

tumhein dekhunga main kaise nazar aisi kahan meri

mujhi par tanz karti hai meri be-chaargi 'mahir'

ki ab to aaKHiri manzil mein hai umr-e-rawan meri