alam aah-o-fughan aansu gile bechaargi le kar

alam āh-o-fuġhāñ aañsū gile bechārgī le kar

tumhāre paas aaya huuñ maiñ apnī zindagī le kar

chaman se ek kāñTā aur ik nāzuk kalī le kar

taqābul kar rahā huuñ zindagī se zindagī le kar

nahīñ chhupte hoñ dhabbe jis se merī be-gunāhī ke

mujhe hājat nahīñ kyā hogā aisī raushnī le kar

tire aariz se ye zulf-e-siyah jab bhī saraktī hai

gagan kā chāñd chhup jaatā hai apnī raushnī le kar

tire ruḳhsār ke til par mujhe aksar ḳhayāl aaya

kañval par jaise bhañvrā ruk gayā ho zindagī le kar

mahal ta.amīr ye jo kar rahā hai ḳhuun se apne

yahī fōtpath par dam toḌ degā bebasī le kar

barā.e-nām 'anvar' huuñ karam ahbāb kā varna

azal hī se muqaddar meñ chalā huuñ tīrgī le kar

alam aah-o-fughan aansu gile bechaargi le kar

tumhaare pas aaya hun main apni zindagi le kar

chaman se ek kanTa aur ek nazuk kali le kar

taqabul kar raha hun zindagi se zindagi le kar

nahin chhupte hon dhabbe jis se meri be-gunahi ke

mujhe hajat nahin kya hoga aisi raushni le kar

tere aariz se ye zulf-e-siyah jab bhi sarakti hai

gagan ka chand chhup jata hai apni raushni le kar

tere ruKHsar ke til par mujhe aksar KHayal aaya

kanwal par jaise bhanwra ruk gaya ho zindagi le kar

mahal tamir ye jo kar raha hai KHun se apne

yahi footpath par dam toD dega bebasi le kar

barae-nam 'anwar' hun karam ahbab ka warna

azal hi se muqaddar mein chala hun tirgi le kar