alam-nasib sahi kuchh to muskura bhi sako

alam-nasīb sahī kuchh to muskurā bhī sako

sahar ke naam pe dīvār-e-shab girā bhī sako

ga.ī rutoñ ke gulāboñ sī hai mahak us meñ

phir us ko yaad karo dil ko gudgudā bhī sako

vo itnā zūd-farāmosh hai to kyā hogā

hazār ahd agar yaad use dilā bhī sako

ye kyā lagāv ki ham rāste kā patthar haiñ

ye kyā gurez ki tum phir palaT ke aa bhī sako

vo dil-fareb sahī kaash dil-zado tum bhī

jo kab kā bhuul chukā hai use bhulā bhī sako

qabā-e-shab meñ sulagte haiñ zaḳhm din bhar ke

lahū kī aag se kuchh raushnī baḌhā bhī sako

ye maanā ik vahī qātil hai shahr meñ 'sarmad'

kam-az-kam us kī nazar se nazar milā bhī sako

alam-nasib sahi kuchh to muskura bhi sako

sahar ke nam pe diwar-e-shab gira bhi sako

gai ruton ke gulabon si hai mahak us mein

phir us ko yaad karo dil ko gudguda bhi sako

wo itna zud-faramosh hai to kya hoga

hazar ahd agar yaad use dila bhi sako

ye kya lagaw ki hum raste ka patthar hain

ye kya gurez ki tum phir palaT ke aa bhi sako

wo dil-fareb sahi kash dil-zado tum bhi

jo kab ka bhul chuka hai use bhula bhi sako

qaba-e-shab mein sulagte hain zaKHm din bhar ke

lahu ki aag se kuchh raushni baDha bhi sako

ye mana ek wahi qatil hai shahr mein 'sarmad'

kam-az-kam us ki nazar se nazar mila bhi sako