alam uThae hue mashalen jalae hue

'alam uThā.e hue mash'aleñ jalā.e hue

vafā ke 'ahd-shanāsoñ pe likh rahe haiñ ham

nazar milī hī nahīñ tishnagī chalī aa.ī

usī nazar kī talāshoñ pe likh rahe haiñ ham

hai intisāb hamārā ba-nām-e-ahl-e-vafā

jafā ke khel tamāshoñ pe likh rahe haiñ ham

zarā sañbhal ke tumheñ aable bhī banñā hai

abhī badan kī ḳharāshoñ pe likh rahe haiñ ham

ye din kisī kī adāoñ pe she'r kahne ke the

ye kyā sitam hai ki lāshoñ pe likh rahe haiñ ham

bane the zīnat-e-aḳhbār jis kī surḳhī se

usī ḳhabar ke tarāshoñ pe likh rahe haiñ ham

'alam uThae hue mash'alen jalae hue

wafa ke 'ahd-shanason pe likh rahe hain hum

nazar mili hi nahin tishnagi chali aai

usi nazar ki talashon pe likh rahe hain hum

hai intisab hamara ba-nam-e-ahl-e-wafa

jafa ke khel tamashon pe likh rahe hain hum

zara sanbhal ke tumhein aable bhi banna hai

abhi badan ki KHarashon pe likh rahe hain hum

ye din kisi ki adaon pe she'r kahne ke the

ye kya sitam hai ki lashon pe likh rahe hain hum

bane the zinat-e-aKHbar jis ki surKHi se

usi KHabar ke tarashon pe likh rahe hain hum