alfaz ke patthar kya phenke gae pani mein

alfāz ke patthar kyā pheñke ga.e paanī meñ

tūfān sā barpā hai dariyā-e-ma.ānī meñ

ḳhushiyoñ ke fasāne hī dohrā.e nahīñ jaate

haiñ rañj ke chhīñTe bhī ghar ghar kī kahānī meñ

jaadū hī ġhazab kā thā aks-e-ruḳh-e-zebā kā

kyuuñ aag na lag jaatī bahte hue paanī meñ

donoñ hī qabīloñ ne paimān-e-vafā bāñdhe

lauT aa.ī vafā phir se har dushman-e-jānī meñ

tarsīl tamaddun kī hotī bhī to phir kaise

aḳhlāq na hotā gar tahzīb ke baanī meñ

misre pe tire 'ārif' misra.a jo huā chaspāñ

ḳhushbū sī utar aa.ī har ūlā-o-sānī meñ

alfaz ke patthar kya phenke gae pani mein

tufan sa barpa hai dariya-e-maani mein

KHushiyon ke fasane hi dohrae nahin jate

hain ranj ke chhinTe bhi ghar ghar ki kahani mein

jadu hi ghazab ka tha aks-e-ruKH-e-zeba ka

kyun aag na lag jati bahte hue pani mein

donon hi qabilon ne paiman-e-wafa bandhe

lauT aai wafa phir se har dushman-e-jaani mein

tarsil tamaddun ki hoti bhi to phir kaise

aKHlaq na hota gar tahzib ke bani mein

misre pe tere 'arif' misra jo hua chaspan

KHushbu si utar aai har ula-o-sani mein