alfaz ko hai dil mein utar jaane ki aadat

alfāz ko hai dil meñ utar jaane kī 'ādat

jis tarh musāfir ko hai ghar jaane kī 'ādat

raste meñ khaḌe ho ke sañvar jaane kī 'ādat

chehre ko bhī kuchh aur nikhar jaane kī 'ādat

ik hashr uThāte hue ā.eñge tire paas

chup-chāp nahīñ ham ko guzar jaane kī 'ādat

sau qism ke jhagḌoñ se bachā letī hai mujh ko

har baat se ye saaf mukar jaane kī 'ādat

ġhamgīn agar hoñ to simaT jaate haiñ ḳhud meñ

lamhāt-e-ḳhushī hoñ to bikhar jaane kī 'ādat

duniyā meñ kabhī sar ko uThā kar nahīñ chalte

jin ko bhī hai āfāt se Dar jaane kī 'ādat

'ḳhālid' hai ye Thahrāv qayāmat kī nishānī

har ek qadam chhoḌ Thahar jaane kī 'ādat

alfaz ko hai dil mein utar jaane ki 'adat

jis tarh musafir ko hai ghar jaane ki 'adat

raste mein khaDe ho ke sanwar jaane ki 'adat

chehre ko bhi kuchh aur nikhar jaane ki 'adat

ek hashr uThate hue aaenge tere pas

chup-chap nahin hum ko guzar jaane ki 'adat

sau qism ke jhagDon se bacha leti hai mujh ko

har baat se ye saf mukar jaane ki 'adat

ghamgin agar hon to simaT jate hain KHud mein

lamhat-e-KHushi hon to bikhar jaane ki 'adat

duniya mein kabhi sar ko uTha kar nahin chalte

jin ko bhi hai aafat se Dar jaane ki 'adat

'KHalid' hai ye Thahraw qayamat ki nishani

har ek qadam chhoD Thahar jaane ki 'adat