aman na pai gham-o-fikr se kabhi maine

amaañ na paa.ī ġham-o-fikr se kabhī maiñ ne

isī ghuTan meñ guzārī hai zindagī maiñ ne

kisī ke naqsh-e-qadam pe jhukā ke sar apnā

buland kar liyā me.ār-e-bandagī maiñ nai

ġham-e-hayāt ne baḳhshā shu.ūr jiine kā

isī añdhere se paa.ī hai raushnī maiñ ne

tū ek karb kā dariyā hai aur kuchh bhī nahīñ

tujhe qarīb se dekhā hai zindagī maiñ ne

tufail-e-rahmat-e-ālam muaaf kar mujh ko

mire karīm ḳhatā kī hai vāqa.ī maiñ ne

kisī hasīñ kī amānat samajh ke ai 'nayyar'

gale lagāyā hai ġham ko ḳhushī ḳhushī maiñ ne

aman na pai gham-o-fikr se kabhi main ne

isi ghuTan mein guzari hai zindagi main ne

kisi ke naqsh-e-qadam pe jhuka ke sar apna

buland kar liya mear-e-bandagi main nai

gham-e-hayat ne baKHsha shuur jine ka

isi andhere se pai hai raushni main ne

tu ek karb ka dariya hai aur kuchh bhi nahin

tujhe qarib se dekha hai zindagi main ne

tufail-e-rahmat-e-alam muaf kar mujh ko

mere karim KHata ki hai waqai main ne

kisi hasin ki amanat samajh ke ai 'nayyar'

gale lagaya hai gham ko KHushi KHushi main ne