amal achchha nahin us ka jo Darta jae hai mujhse

amal achchhā nahīñ us kā jo Dartā jaa.e hai mujh se

vo kāfir jo ḳhudā ko bhī na sauñpā jaa.e hai mujh se

ye luqma hai ajal kā yā tire hāthoñ kā biiḌā hai

na uglā jaa.e hai mujh se na niglā jaa.e hai mujh se

kabhī himmat-shikan tūfāñ kabhī sāhil kā nazzāra

na Duubā jaa.e hai mujh se na tairā jaa.e hai mujh se

adū ke saath terī dil-lagī bhī ik ajab shai hai

na rokā jaa.e hai mujh se na dekhā jaa.e hai mujh se

kabhī tanhā.ī meñ vo guftugū mujh se lagāvaT kī

sar-e-bāzār mil jaa.e to akḌā jaa.e hai mujh se

vajūd-e-ālam-e-fānī meñ ye āsāniyāñ kaisī

ḳhudā kā ghar hai dil nazdīk hotā jaa.e hai mujh se

agar maiñ dekhtā huuñ is bayābān-e-chaman ko 'shād'

koī manzar achānak duur hotā jaa.e hai mujh se

amal achchha nahin us ka jo Darta jae hai mujh se

wo kafir jo KHuda ko bhi na saunpa jae hai mujh se

ye luqma hai ajal ka ya tere hathon ka biDa hai

na ugla jae hai mujh se na nigla jae hai mujh se

kabhi himmat-shikan tufan kabhi sahil ka nazzara

na Duba jae hai mujh se na taira jae hai mujh se

adu ke sath teri dil-lagi bhi ek ajab shai hai

na roka jae hai mujh se na dekha jae hai mujh se

kabhi tanhai mein wo guftugu mujh se lagawaT ki

sar-e-bazar mil jae to akDa jae hai mujh se

wajud-e-alam-e-fani mein ye aasaniyan kaisi

KHuda ka ghar hai dil nazdik hota jae hai mujh se

agar main dekhta hun is bayaban-e-chaman ko 'shad'

koi manzar achanak dur hota jae hai mujh se