amir-e-shahr ke aangan mein jab ujale hue

amīr-e-shahr ke āñgan meñ jab ujāle hue

na jaane kitne gharoñ ke charāġh kaale hue

isī zamīñ ke ḳhudā qabr-gāh meñ apnī

haiñ apnī jism kī miTTī pe ḳhaak Daale hue

tumhārī fikr kī kotāh-qad havelī meñ

bujhe charāġh to phir makḌiyoñ ke jaale hue

muḳhālifīn kā ab shaġhl ho gayā hai yahī

uchhālte haiñ ye jumle mire uchhāle hue

ajiib baat hai ḳhud merī āstīn ke saañp

mujhī ko ghūrte rahte haiñ sar nikāle hue

hamāre shahr meñ lafzoñ kī khetiyāñ haiñ bahut

qadīm log haiñ saare luġhat khañgāle hue

ye ahl-e-fan meñ bhī kiiḌe nikāl dete haiñ

hasad kā tauq jo haiñ gardanoñ meñ Daale hue

amir-e-shahr ke aangan mein jab ujale hue

na jaane kitne gharon ke charagh kale hue

isi zamin ke KHuda qabr-gah mein apni

hain apni jism ki miTTi pe KHak Dale hue

tumhaari fikr ki kotah-qad haweli mein

bujhe charagh to phir makDiyon ke jale hue

muKHalifin ka ab shaghl ho gaya hai yahi

uchhaalte hain ye jumle mere uchhaale hue

ajib baat hai KHud meri aastin ke sanp

mujhi ko ghurte rahte hain sar nikale hue

hamare shahr mein lafzon ki khetiyan hain bahut

qadim log hain sare lughat khangale hue

ye ahl-e-fan mein bhi kiDe nikal dete hain

hasad ka tauq jo hain gardanon mein Dale hue