amiri hai na wo aalam-panahi

amīrī hai na vo ālam-panāhī

faqīroñ kī vahī hai kaj-kulāhī

tabassum aa gayā un ke laboñ par

mujhe raas aa ga.ī apnī tabāhī

kisī kā naam le kar chal diye haiñ

na pūchho ham haiñ kis manzil ke raahī

kahīñ ifshā na kar de rāz-e-ulfat

sar-e-mahfil kisī kī kam-nigāhī

kisī din rang lā.egī jahāñ meñ

gunah-gārān-e-ġham kī be-gunāhī

nasheman ke ujaḌne kā nahīñ ġham

na dekhūñ maiñ gulistāñ kī tabāhī

zamāne meñ hue mash.hūr donoñ

kisī kā zulm merī be-gunāhī

kahīñ roke se ruk saktī hai 'shāriq'

jo likkhī hai muqaddar meñ tabāhī

amiri hai na wo aalam-panahi

faqiron ki wahi hai kaj-kulahi

tabassum aa gaya un ke labon par

mujhe ras aa gai apni tabahi

kisi ka nam le kar chal diye hain

na puchho hum hain kis manzil ke rahi

kahin ifsha na kar de raaz-e-ulfat

sar-e-mahfil kisi ki kam-nigahi

kisi din rang laegi jahan mein

gunah-garan-e-gham ki be-gunahi

nasheman ke ujaDne ka nahin gham

na dekhun main gulistan ki tabahi

zamane mein hue mashhur donon

kisi ka zulm meri be-gunahi

kahin roke se ruk sakti hai 'shaariq'

jo likkhi hai muqaddar mein tabahi