amiron ke bure atwar ko jo Thik samjhe hai

amīroñ ke bure atvār ko jo Thiik samjhe hai

mirī haq baat ko vo qābil-e-tashkīk samjhe hai

bahut mushkil hai jo us kī ġharībī duur ho jaa.e

'ajab ḳhuddār hai imdād ko bhī bhiik samjhe hai

mire baare meñ us ke kaan bhartā hai koī shāyad

bayāñ tausīf kartā huuñ to vo taz.hīk samjhe hai

tire ḳhat terī tasvīreñ shikasta-dil ke kuchh TukḌe

tirā dīvāna in sab ko tirī tamlīk samjhe hai

maiñ us ke har gumāñ kā paas aksar rakkhā kartā huuñ

mirā dil apne dil ke vo bahut nazdīk samjhe hai

chale hai is tarah jaise chale talvār par koī

vo merī rahguzar ko jaane kyuuñ bārīk samjhe hai

siyāsat ke añdheroñ ne ujāle sab nigal Daale

ġharīb insān din ko bhī shab-e-tārīk samjhe hai

amiron ke bure atwar ko jo Thik samjhe hai

meri haq baat ko wo qabil-e-tashkik samjhe hai

bahut mushkil hai jo us ki gharibi dur ho jae

'ajab KHuddar hai imdad ko bhi bhik samjhe hai

mere bare mein us ke kan bharta hai koi shayad

bayan tausif karta hun to wo tazhik samjhe hai

tere KHat teri taswiren shikasta-dil ke kuchh TukDe

tera diwana in sab ko teri tamlik samjhe hai

main us ke har guman ka pas aksar rakkha karta hun

mera dil apne dil ke wo bahut nazdik samjhe hai

chale hai is tarah jaise chale talwar par koi

wo meri rahguzar ko jaane kyun barik samjhe hai

siyasat ke andheron ne ujale sab nigal Dale

gharib insan din ko bhi shab-e-tarik samjhe hai