ana hawas ki dukanon mein aa ke baiTh gai

anā havas kī dukānoñ meñ aa ke baiTh ga.ī

ajiib mainā hai shikroñ meñ aa ke baiTh ga.ī

jagā rahā hai zamāna magar nahīñ khultīñ

kahāñ kī niiñd in āñkhoñ meñ aa ke baiTh ga.ī

vo fāḳhta jo mujhe dekhte hī uḌtī thī

baḌe salīqe se bachchoñ meñ aa ke baiTh ga.ī

tamām talḳhiyāñ sāġhar meñ raqs karne lagīñ

tamām gard kitāboñ meñ aa ke baiTh ga.ī

tamām shahr meñ mauzū-e-guftugū hai yahī

ki shāhzādī ġhulāmoñ meñ aa ke baiTh ga.ī

nahīñ thī dūsrī koī jagah bhī chhupne kī

hamārī umr khilaunoñ meñ aa ke baiTh ga.ī

uTho ki os kī būñdeñ jagā rahī haiñ tumheñ

chalo ki dhuup darīchoñ meñ aa ke baiTh ga.ī

chalī thī dekhne sūraj kī bad-mizājī ko

magar ye os bhī phūloñ meñ aa ke baiTh ga.ī

tujhe maiñ kaise batā.ūñ ki shaam hote hī

udāsī kamre ke tāqoñ meñ aa ke baiTh ga.ī

ana hawas ki dukanon mein aa ke baiTh gai

ajib maina hai shikron mein aa ke baiTh gai

jaga raha hai zamana magar nahin khultin

kahan ki nind in aankhon mein aa ke baiTh gai

wo faKHta jo mujhe dekhte hi uDti thi

baDe saliqe se bachchon mein aa ke baiTh gai

tamam talKHiyan saghar mein raqs karne lagin

tamam gard kitabon mein aa ke baiTh gai

tamam shahr mein mauzu-e-guftugu hai yahi

ki shahzadi ghulamon mein aa ke baiTh gai

nahin thi dusri koi jagah bhi chhupne ki

hamari umr khilaunon mein aa ke baiTh gai

uTho ki os ki bunden jaga rahi hain tumhein

chalo ki dhup darichon mein aa ke baiTh gai

chali thi dekhne suraj ki bad-mizaji ko

magar ye os bhi phulon mein aa ke baiTh gai

tujhe main kaise bataun ki sham hote hi

udasi kamre ke taqon mein aa ke baiTh gai