andaz nirala hai ada aur hi kuchh hai

andāz nirālā hai adā aur hī kuchh hai

ye husn nahīñ nām-e-ḳhudā aur hī kuchh hai

kahte ho ham ab ġhair ko aane nahīñ dete

yā-rab yahī sach ho pe sunā aur hī kuchh hai

parda na rakhā tere lab-e-rūh-fazā ne

ham jānte the āb-e-baqā aur hī kuchh hai

jo maiñ ne kahā thā vo bigaḌne kī na thī baat

kahtā huuñ ki qāsid ne kahā aur hī kuchh hai

hamdam yahī jānāñ kī judā.ī kā hai ronā

kahte haiñ jise marg vo kyā aur hī kuchh hai

iisā se kaho murda-e-sad-sāla jilā leñ

bīmār-e-mohabbat kī davā aur hī kuchh hai

farhād-e-havas-pesha ne bhī dī to sahī jaan

par sheva-e-arbāb-e-vafā aur hī kuchh hai

tum husn kī ḳhairāt meñ kyā dete ho laao

har-chand tamannā-e-gadā aur hī kuchh hai

ham zohd-o-ibādat ke bhī munkir nahīñ 'nāzim'

par qā.eda-e-faqr-o-fanā aur hī kuchh hai

andaz nirala hai ada aur hi kuchh hai

ye husn nahin nam-e-KHuda aur hi kuchh hai

kahte ho hum ab ghair ko aane nahin dete

ya-rab yahi sach ho pe suna aur hi kuchh hai

parda na rakha tere lab-e-ruh-faza ne

hum jaante the aab-e-baqa aur hi kuchh hai

jo main ne kaha tha wo bigaDne ki na thi baat

kahta hun ki qasid ne kaha aur hi kuchh hai

hamdam yahi jaanan ki judai ka hai rona

kahte hain jise marg wo kya aur hi kuchh hai

isa se kaho murda-e-sad-sala jila len

bimar-e-mohabbat ki dawa aur hi kuchh hai

farhad-e-hawas-pesha ne bhi di to sahi jaan

par shewa-e-arbab-e-wafa aur hi kuchh hai

tum husn ki KHairaat mein kya dete ho lao

har-chand tamanna-e-gada aur hi kuchh hai

hum zohd-o-ibaadat ke bhi munkir nahin 'nazim'

par qaeda-e-faqr-o-fana aur hi kuchh hai