andar bhi tha KHala so KHala dekhta raha

andar bhī thā ḳhalā so ḳhalā dekhtā rahā

maiñ āsmāñ kī samt khaḌā dekhtā rahā

ik maiñ ki dekhtā rahā us meñ ḳhudā ko aur

ik aur shaḳhs mujh meñ ḳhudā dekhtā rahā

merī nashist us se zarā duur thī magar

maiñ us ke saath ḳhālī jagah dekhtā rahā

āñkhoñ meñ is qadar thī mire tīrgī ki maiñ

jalte hue diye ko bujhā dekhtā rahā

andar purāne zaḳhm kī sūrat bigaḌ ga.ī

maiñ chehra aa.ine meñ khaḌā dekhtā rahā

kuchh aur dekhne ko nahīñ thā ki dekhtā

so vaqt ko guzartā huā dekhtā rahā

vo mujh se pūchhtā rahā kaise ho tum 'uzair'

aur maiñ havā meñ jaltā diyā dekhtā rahā

andar bhi tha KHala so KHala dekhta raha

main aasman ki samt khaDa dekhta raha

ek main ki dekhta raha us mein KHuda ko aur

ek aur shaKHs mujh mein KHuda dekhta raha

meri nashist us se zara dur thi magar

main us ke sath KHali jagah dekhta raha

aankhon mein is qadar thi mere tirgi ki main

jalte hue diye ko bujha dekhta raha

andar purane zaKHm ki surat bigaD gai

main chehra aaine mein khaDa dekhta raha

kuchh aur dekhne ko nahin tha ki dekhta

so waqt ko guzarta hua dekhta raha

wo mujh se puchhta raha kaise ho tum 'uzair'

aur main hawa mein jalta diya dekhta raha