andher shab-e-hijr mein kya kya nahin hota

andher shab-e-hijr meñ kyā kyā nahīñ hotā

kab hashr sar-e-shām se barpā nahīñ hotā

bīmār-e-mohabbat kabhī achchhā nahīñ hotā

ye dard vo hai jis kā mudāvā nahīñ hotā

ho laakh hasīñ husn kā shahrā nahīñ hotā

tum ko to zarā ḳhauf ḳhudā kā nahīñ hotā

maqbūl vahāñ ishq kā sajda nahīñ hotā

jis jā pa tirā naqsh-e-kaf-e-pā nahīñ hotā

ye dil usī qābil hai use ḳhuub jalāo

us par jo sitam hotā hai bejā nahīñ hotā

apnoñ hī se hotī hai shikāyat bhī gilā bhī

ulfat meñ kisī ġhair se shikva nahīñ hotā

aatā hī samajh meñ nahīñ iqrār bhī un kā

hotā hai us andāz se goyā nahīñ hotā

ye bhī mirī qismat ki zabāñ aisī milī hai

jis se ki adā harf-e-tamannā nahīñ hotā

ai shaiḳh khule bandoñ meñ piine meñ maza hai

ye shaġhl chhupā kar pas-e-parda nahīñ hotā

aatā hai mujhe dasht nazar josh-e-junūñ meñ

hālāñki vo ghar hotā hai sahrā nahīñ hotā

be-ġham haiñ har ik fikr se rindān-e-ḳharābāt

un ko kabhī andesha-e-fardā nahīñ hotā

ye saḳhtiyāñ har roz kī kaise sahe koī

insān ke patthar kā kalejā nahīñ hotā

ab ġham bhī mire dil se ye kartā hai shikāyat

is ḳhāna-vīrāñ meñ guzārā nahīñ hotā

ai shaiḳh ye barkat hai ki p jaate haiñ lākhoñ

phir bhī kabhī ḳhālī ḳhum-e-sahbā nahīñ hotā

vo ham bhī suneñ taur pe jo tum ne sunā thā

ham se to yahī hazrat-e-mūsā nahīñ hotā

zāhir meñ chhupeñ aa.eñ nigāhoñ meñ diloñ meñ

tauhīn hai parde ke ye pardā nahīñ hotā

aa paḌtī hai uftād kuchh is tarah kī nāseh

ulfat meñ koī shauq se rusvā nahīñ hotā

kah do zarā aġhyār se sañbhle hue aa.eñ

maqtal hai yahāñ khel tamāshā nahīñ hotā

the tālib-e-dīdār to sañbhle hue rahte

muusā koī yuuñ mahv-e-tajallī nahīñ hotā

ulfat meñ mazā 'ishq meñ lazzat nahīñ miltī

jab tak ki koī dard sarāpā nahīñ hotā

andher shab-e-hijr mein kya kya nahin hota

kab hashr sar-e-sham se barpa nahin hota

bimar-e-mohabbat kabhi achchha nahin hota

ye dard wo hai jis ka mudawa nahin hota

ho lakh hasin husn ka shahra nahin hota

tum ko to zara KHauf KHuda ka nahin hota

maqbul wahan ishq ka sajda nahin hota

jis ja pa tera naqsh-e-kaf-e-pa nahin hota

ye dil usi qabil hai use KHub jalao

us par jo sitam hota hai beja nahin hota

apnon hi se hoti hai shikayat bhi gila bhi

ulfat mein kisi ghair se shikwa nahin hota

aata hi samajh mein nahin iqrar bhi un ka

hota hai us andaz se goya nahin hota

ye bhi meri qismat ki zaban aisi mili hai

jis se ki ada harf-e-tamanna nahin hota

ai shaiKH khule bandon mein pine mein maza hai

ye shaghl chhupa kar pas-e-parda nahin hota

aata hai mujhe dasht nazar josh-e-junun mein

haalanki wo ghar hota hai sahra nahin hota

be-gham hain har ek fikr se rindan-e-KHarabaat

un ko kabhi andesha-e-farda nahin hota

ye saKHtiyan har roz ki kaise sahe koi

insan ke patthar ka kaleja nahin hota

ab gham bhi mere dil se ye karta hai shikayat

is KHana-viran mein guzara nahin hota

ai shaiKH ye barkat hai ki p jate hain lakhon

phir bhi kabhi KHali KHum-e-sahba nahin hota

wo hum bhi sunen taur pe jo tum ne suna tha

hum se to yahi hazrat-e-musa nahin hota

zahir mein chhupen aaen nigahon mein dilon mein

tauhin hai parde ke ye parda nahin hota

aa paDti hai uftad kuchh is tarah ki naseh

ulfat mein koi shauq se ruswa nahin hota

kah do zara aghyar se sanbhle hue aaen

maqtal hai yahan khel tamasha nahin hota

the talib-e-didar to sanbhle hue rahte

musa koi yun mahw-e-tajalli nahin hota

ulfat mein maza 'ishq mein lazzat nahin milti

jab tak ki koi dard sarapa nahin hota