andhere din ki safarat ko aae hain ab ke

añdhere din kī safārat ko aa.e haiñ ab ke

haiñ kitnī raushaniyāñ ishtihār meñ shab ke

yahāñ to dekh liye ham ne hausle sab ke

mile na dost na dushman hī apne mansab ke

bas ek baat pe nākāmiyoñ ne gher liyā

zabāñ se aa.e laboñ tak na harf matlab ke

jo lab-kushāda the vo mudda.ī bane lekin

jo dil-kushāda the vo kaam aa ga.e sab ke

ik āh-e-ḳhushk hī apne nasīb meñ niklī

bahut hī shor sune jazba-e-labā-lab ke

judā.iyāñ to muqaddar haiñ lekin ik ġham-e-hijr

ajiib phuul se sāthī bikhar ga.e ab ke

bhaTak rahā hai dayār-e-ḳhirad meñ kyuuñ ġham-e-dil

gharoñ ko lauT chuke saare bā-vafā kab ke

zamīn-e-saḳht meñ lafzoñ ke gul khilā.e haiñ

ġhazal kahī to hue qaa.il apne kartab ke

hazār us ne bhī chakkar diye magar 'bāqar'

rahe na ham bhī kabhī āsmān se dab ke

andhere din ki safarat ko aae hain ab ke

hain kitni raushaniyan ishtihaar mein shab ke

yahan to dekh liye hum ne hausle sab ke

mile na dost na dushman hi apne mansab ke

bas ek baat pe nakaamiyon ne gher liya

zaban se aae labon tak na harf matlab ke

jo lab-kushada the wo muddai bane lekin

jo dil-kushada the wo kaam aa gae sab ke

ek aah-e-KHushk hi apne nasib mein nikli

bahut hi shor sune jazba-e-laba-lab ke

judaiyan to muqaddar hain lekin ek gham-e-hijr

ajib phul se sathi bikhar gae ab ke

bhaTak raha hai dayar-e-KHirad mein kyun gham-e-dil

gharon ko lauT chuke sare ba-wafa kab ke

zamin-e-saKHt mein lafzon ke gul khilae hain

ghazal kahi to hue qail apne kartab ke

hazar us ne bhi chakkar diye magar 'baqar'

rahe na hum bhi kabhi aasman se dab ke