andhere mein ujala sa lage hai

añdhere meñ ujālā sā lage hai

mujhe ab ġhair bhī apnā lage hai

bhare bāzār meñ tanhā lage hai

vo har parde meñ be-parda lage hai

mire dil meñ khaTaktī hai tamanna

mujhe har phuul ab kāñTā lage hai

madārī ne pate kī baat kah dī

mirā bandar mujhe daanā lage hai

jise pāyāb samjhā vo kināra

samundar se kahīñ gahrā lage hai

guzarnā hai tujhe phir imtihāñ se

vo apne qaul se phirtā lage hai

tujhe do buuñd paanī kaun detā

samundar bhī yahāñ pyāsā lage hai

lahū rotī haiñ āñkheñ jis kī ḳhātir

mirā ronā use gaanā lage hai

purānī rasm hai jūñ-tūñ nibhāo

na.e hālāt se Dar sā lage hai

ghaTā kī chhāñv se vaadī meñ utro

shagūfa sā vahāñ khiltā lage hai

isī ehsās ke dam se huuñ zinda

tirī āñkhoñ meñ kuchh apnā lage hai

andhere mein ujala sa lage hai

mujhe ab ghair bhi apna lage hai

bhare bazar mein tanha lage hai

wo har parde mein be-parda lage hai

mere dil mein khaTakti hai tamanna

mujhe har phul ab kanTa lage hai

madari ne pate ki baat kah di

mera bandar mujhe dana lage hai

jise payab samjha wo kinara

samundar se kahin gahra lage hai

guzarna hai tujhe phir imtihan se

wo apne qaul se phirta lage hai

tujhe do bund pani kaun deta

samundar bhi yahan pyasa lage hai

lahu roti hain aankhen jis ki KHatir

mera rona use gana lage hai

purani rasm hai jun-tun nibhao

nae haalat se Dar sa lage hai

ghaTa ki chhanw se wadi mein utro

shagufa sa wahan khilta lage hai

isi ehsas ke dam se hun zinda

teri aankhon mein kuchh apna lage hai