andheron ki hukumat ko miTa kar apne ghar aaya

añdheroñ kī hukūmat ko miTā kar apne ghar aayā

savere jaise hī āñkheñ khulī sūraj nazar aayā

gayā mathurā banaras aur ka.aba har jagah lekin

milā dil ko sukūñ jab lauT kar maiñ apne ghar aayā

paḌī hai maar jab se vaqt kī Darne lagā huuñ maiñ

chaḌhā thā jo javānī kā nasha pal meñ utar aayā

ka.ī kāñTe bichhā.e dostoñ ne raah meñ merī

unheñ chun kar unhīñ rāhoñ se maiñ sābit guzar aayā

akelā laḌ rahā huuñ zindagī kī jañg bachpan se

balā kī bhiiḌ hai koī nahīñ apnā nazar aayā

gharoñ meñ qaid ho kar rah ga.ī hai zindagī sab kī

zamāne kī fazā meñ dost kaisā ye asar aayā

zamāne vaale to kahte raheñge kahne do in ko

hamesha maare haiñ patthar nazar jo bhī shajar aayā

duāoñ kā asar hai mere purkhoñ kī ye 'indorī'

hamesha dushmanoñ ke ghar meñ un ke par katar aayā

andheron ki hukumat ko miTa kar apne ghar aaya

sawere jaise hi aankhen khuli suraj nazar aaya

gaya mathura banaras aur kaba har jagah lekin

mila dil ko sukun jab lauT kar main apne ghar aaya

paDi hai mar jab se waqt ki Darne laga hun main

chaDha tha jo jawani ka nasha pal mein utar aaya

kai kanTe bichhae doston ne rah mein meri

unhen chun kar unhin rahon se main sabit guzar aaya

akela laD raha hun zindagi ki jang bachpan se

bala ki bhiD hai koi nahin apna nazar aaya

gharon mein qaid ho kar rah gai hai zindagi sab ki

zamane ki faza mein dost kaisa ye asar aaya

zamane wale to kahte rahenge kahne do in ko

hamesha mare hain patthar nazar jo bhi shajar aaya

duaon ka asar hai mere purkhon ki ye 'indori'

hamesha dushmanon ke ghar mein un ke par katar aaya