angar-e-tajalli nahin shabnam bhi nahin hai

angār-e-tajallī nahīñ shabnam bhī nahīñ hai

āñkhoñ meñ koī vādī-e-nīlam bhī nahīñ hai

maiñ gulshan-e-ulfat ke muqaddar se barī huuñ

ab dil meñ mire ḳhvāhish-e-hamdam bhī nahīñ hai

bārān-e-tajassus kabhī barsī nahīñ mujh par

sochoñ kā koī tā.ir-e-mausam bhī nahīñ hai

qātil hai ki phūloñ kā lahū piitā hai har din

hairat hai ki is par koī mātam bhī nahīñ hai

duniyā hai ki shamshīreñ chalātī hai mujhī par

maiñ huuñ ki mire zaḳhmoñ pe marham bhī nahīñ hai

muskāne se chamkegī kabhī bū-e-muqaddar

varna to ḳhushī kā koī parcham bhī nahīñ hai

maiñ 'kāvish'-e-lā-harf-e-takallum se huuñ nādim

vo jis ko ki maazī kā koī ġham bhī nahīñ hai

angar-e-tajalli nahin shabnam bhi nahin hai

aankhon mein koi wadi-e-nilam bhi nahin hai

main gulshan-e-ulfat ke muqaddar se bari hun

ab dil mein mere KHwahish-e-hamdam bhi nahin hai

baran-e-tajassus kabhi barsi nahin mujh par

sochon ka koi tair-e-mausam bhi nahin hai

qatil hai ki phulon ka lahu pita hai har din

hairat hai ki is par koi matam bhi nahin hai

duniya hai ki shamshiren chalati hai mujhi par

main hun ki mere zaKHmon pe marham bhi nahin hai

muskane se chamkegi kabhi bu-e-muqaddar

warna to KHushi ka koi parcham bhi nahin hai

main 'kawish'-e-la-harf-e-takallum se hun nadim

wo jis ko ki mazi ka koi gham bhi nahin hai