anginat the peD lekin dur tak saya na tha

anginat the peḌ lekin duur tak saaya na thā

ḳhvāb aisā aaj se pahle kabhī dekhā na thā

'umr kam hotī hai sunte the mohabbat kī magar

roz-o-shab lamhoñ meñ Dhal jā.eñge andāza na thā

baa'd tere jaane kyoñ mashkūk sā rahne lagā

varna dil merā kisī tūfāñ se ghabrātā na thā

sochtā huuñ kyoñ milā maiñ us se kyoñ chāhā use

qurb us kā jab mirī qismat hī meñ likkhā na thā

chāñd hī vo shai hai duniyā meñ nahīñ jis kā javāb

maiñ samajhtā thā yahī jab tak tujhe dekhā na thā

phir bhī jaane kyoñ vo dukh-sukh meñ rahā aksar sharīk

mere us ke darmiyāñ aisā koī rishta na thā

varġhalāne meñ na aayā vo ye ḳhūbī us meñ thī

vo mirā dushman thā lekin kaan kā kachchā na thā

pyaar thā dil meñ vafā thī jazba-e-īsār thā

kal kā insāñ daur-e-hāzir ke bashar jaisā na thā

ab to dekhā tū ne 'gulshan' tark kar ke aarzū

zindagī dushvār ho jā.egī maiñ kahtā na thā

anginat the peD lekin dur tak saya na tha

KHwab aisa aaj se pahle kabhi dekha na tha

'umr kam hoti hai sunte the mohabbat ki magar

roz-o-shab lamhon mein Dhal jaenge andaza na tha

ba'd tere jaane kyon mashkuk sa rahne laga

warna dil mera kisi tufan se ghabraata na tha

sochta hun kyon mila main us se kyon chaha use

qurb us ka jab meri qismat hi mein likkha na tha

chand hi wo shai hai duniya mein nahin jis ka jawab

main samajhta tha yahi jab tak tujhe dekha na tha

phir bhi jaane kyon wo dukh-sukh mein raha aksar sharik

mere us ke darmiyan aisa koi rishta na tha

warghalane mein na aaya wo ye KHubi us mein thi

wo mera dushman tha lekin kan ka kachcha na tha

pyar tha dil mein wafa thi jazba-e-isar tha

kal ka insan daur-e-hazir ke bashar jaisa na tha

ab to dekha tu ne 'gulshan' tark kar ke aarzu

zindagi dushwar ho jaegi main kahta na tha