anwar-e-nau-ba-nau se mamur ho ke uTTha

anvār-e-nau-ba-nau se mā'mūr ho ke uTThā

dil un kī anjuman se pur-nūr ho ke uTThā

husn-e-talab kī zau se ḳhud ban gayā tajallī

aiman kī vādiyoñ se dil tuur ho ke uTThā

girdāb-e-mustaqil huuñ maiñ sat.h-e-bahr-e-ġham par

mauj-e-fanā kī zad se majbūr ho ke uTThā

har ek sang-e-dar hai merī jabīñ kā tālib

maiñ un ke āstāñ se mansūr ho ke uTThā

rāh-e-talab meñ aksar aise maqām aa.e

har naqsh-e-pā-e-manzil pur-nūr ho ke uTThā

mujh se na pūchh saaqī dekh apnī be-ruḳhī ko

maiñ terī anjuman se majbūr ho ke uTThā

anjām-e-gulsitāñ par 'māhir' maiñ hañs rahā huuñ

jo gul khilā chaman meñ be-nūr ho ke uTThā

anwar-e-nau-ba-nau se ma'mur ho ke uTTha

dil un ki anjuman se pur-nur ho ke uTTha

husn-e-talab ki zau se KHud ban gaya tajalli

aiman ki wadiyon se dil tur ho ke uTTha

girdab-e-mustaqil hun main sath-e-bahr-e-gham par

mauj-e-fana ki zad se majbur ho ke uTTha

har ek sang-e-dar hai meri jabin ka talib

main un ke aastan se mansur ho ke uTTha

rah-e-talab mein aksar aise maqam aae

har naqsh-e-pa-e-manzil pur-nur ho ke uTTha

mujh se na puchh saqi dekh apni be-ruKHi ko

main teri anjuman se majbur ho ke uTTha

anjam-e-gulsitan par 'mahir' main hans raha hun

jo gul khila chaman mein be-nur ho ke uTTha