apna dil apni nazar apna jigar dekhenge

apnā dil apnī nazar apnā jigar dekheñge

aaj ham ḳhud ko ba-andāz-e-digar dekheñge

baaġh par yūrish-e-barq aur sharar dekheñge

ham se dekhā to na jā.egā magar dekheñge

raat ko hijr meñ dil is tarah taḌpā hai ki bas

ham ko ummīd nahīñ thī ki sahar dekheñge

aaj māñgeñge duāoñ meñ ḳhudā se un ko

aaj ham apnī duāoñ kā asar dekheñge

shahr meñ yuuñ to haiñ ḳhush-chehra ka.ī log magar

kis ke chehre pe Thahartī hai nazar dekheñge

aaj me.arāj pe hai shauq-e-nazāra apnā

un kā jalva nazar aa.egā jidhar dekheñge

vo musāfir huuñ safar hai mirā paiham jaarī

chāñd ko aap faqat tā-ba-sahar dekheñge

baaġh kā hashr jo honā hai vo hogā lekin

koshisheñ us ko bachāne kī to kar dekheñge

haath fankār ke kaaTe ga.e lekin phir bhī

aap jis shahr meñ jā.eñge 'hunar' dekheñge

apna dil apni nazar apna jigar dekhenge

aaj hum KHud ko ba-andaz-e-digar dekhenge

bagh par yurish-e-barq aur sharar dekhenge

hum se dekha to na jaega magar dekhenge

raat ko hijr mein dil is tarah taDpa hai ki bas

hum ko ummid nahin thi ki sahar dekhenge

aaj mangenge duaon mein KHuda se un ko

aaj hum apni duaon ka asar dekhenge

shahr mein yun to hain KHush-chehra kai log magar

kis ke chehre pe Thaharti hai nazar dekhenge

aaj mearaj pe hai shauq-e-nazara apna

un ka jalwa nazar aaega jidhar dekhenge

wo musafir hun safar hai mera paiham jari

chand ko aap faqat ta-ba-sahar dekhenge

bagh ka hashr jo hona hai wo hoga lekin

koshishen us ko bachane ki to kar dekhenge

hath fankar ke kaTe gae lekin phir bhi

aap jis shahr mein jaenge 'hunar' dekhenge