apna dil tera mal tha kya tha

apnā dil terā maal thā kyā thā

jiinā tujh bin muhāl thā kyā thā

hausla dil kī ārzūoñ kā

auj thā yā zavāl thā kyā thā

e'tibār-e-vajūd tā-dam-e-marg

ḳhvāb thā yā ḳhayāl thā kyā thā

duur nār-o-jināñ ko samjhe the

vo to apnā ma.aal thā kyā thā

be-ḳhudī hāsil-e-ḳhudī niklī

kaun jaane visāl thā kyā thā

pās-e-nāmūs-e-‘ishq kar 'shabbīr'

kis se terā savāl thā kyā thā

apna dil tera mal tha kya tha

jina tujh bin muhaal tha kya tha

hausla dil ki aarzuon ka

auj tha ya zawal tha kya tha

e'tibar-e-wajud ta-dam-e-marg

KHwab tha ya KHayal tha kya tha

dur nar-o-jinan ko samjhe the

wo to apna maal tha kya tha

be-KHudi hasil-e-KHudi nikli

kaun jaane visal tha kya tha

pas-e-namus-e-‘ishq kar 'shabbir'

kis se tera sawal tha kya tha