apna hi choT de ke koi jab chala gaya

apnā hī choT de ke koī jab chalā gayā

ilzām mere zaḳhm kā mujh par hī aa gayā

phir dūsrī kitāb meñ merā na dil lagā

ya.anī tumhāre baad bhī tum ko paḌhā gayā

jiine kī mere vaj.h koī bhī nahīñ rahī

tū āḳhirī umiid thā tū bhī chalā gayā

tang aa ke zindagī se maiñ marne pe thā ba-zid

itne meñ ek haath mire sar pe aa gayā

ik umr terī justujū meñ mubtalā rahā

ik umr terī yaad meñ tanhā rahā gayā

kuchh der mujh ko ġhaur se sab dekhte rahe

kuchh der baad zor se mujh ko sunā gayā

do-chār din hī aañkh meñ aañsū maiñ rakh sakā

do-chār din meñ hādisa dil meñ samā gayā

jo dard kah sakā na kisī ġham-gusār se

sad-shukr hai ki vo mirī ġhazloñ meñ aa gayā

'sohil' vo ek shaḳhs jo suntā thā hāl-e-dil

nā-sāz ham ko jaan ke chhuTkārā pā gayā

apna hi choT de ke koi jab chala gaya

ilzam mere zaKHm ka mujh par hi aa gaya

phir dusri kitab mein mera na dil laga

yani tumhaare baad bhi tum ko paDha gaya

jine ki mere wajh koi bhi nahin rahi

tu aaKHiri umid tha tu bhi chala gaya

tang aa ke zindagi se main marne pe tha ba-zid

itne mein ek hath mere sar pe aa gaya

ek umr teri justuju mein mubtala raha

ek umr teri yaad mein tanha raha gaya

kuchh der mujh ko ghaur se sab dekhte rahe

kuchh der baad zor se mujh ko suna gaya

do-chaar din hi aankh mein aansu main rakh saka

do-chaar din mein hadisa dil mein sama gaya

jo dard kah saka na kisi gham-gusar se

sad-shukr hai ki wo meri ghazlon mein aa gaya

'sohil' wo ek shaKHs jo sunta tha haal-e-dil

na-saz hum ko jaan ke chhuTkara pa gaya