apna iman-o-din samajhte hain

apnā īmān-o-dīñ samajhte haiñ

ham tujhe bil-yaqīñ samajhte haiñ

dil kī har ahl-e-dil samajhtā hai

aap hī ik nahīñ samajhte haiñ

apne dil kī jo baat sunte hoñ

'aql kī vo kahīñ samajhte haiñ

tum ko duniyā ḳhudā samajhtī hai

ek ham hī nahīñ samajhte haiñ

tere kūche kī sarzamīñ kī qasam

ham use kab zamīñ samajhte haiñ

tark-e-ulfat ba'īd-e-fitrat ho

maslahat ke qarīñ samajhte haiñ

kaam apnā niyāz-mandī hai

ham bhī ai nāznīñ samajhte haiñ

ham se uljhe na mohtasib hargiz

ham ki sab āñ-o-īñ samajhte haiñ

ġhair samjhā hai lā-makāñ jis ko

ham use dil-nashīñ samajhte haiñ

ham tire pyaar ke haiñ dā'vedār

ḳhud ko shāyad hasīñ samajhte haiñ

ai 'amar' ye to jeb-o-dāmāñ hai

jis ko ham āstīñ samajhte haiñ

apna iman-o-din samajhte hain

hum tujhe bil-yaqin samajhte hain

dil ki har ahl-e-dil samajhta hai

aap hi ek nahin samajhte hain

apne dil ki jo baat sunte hon

'aql ki wo kahin samajhte hain

tum ko duniya KHuda samajhti hai

ek hum hi nahin samajhte hain

tere kuche ki sarzamin ki qasam

hum use kab zamin samajhte hain

tark-e-ulfat ba'id-e-fitrat ho

maslahat ke qarin samajhte hain

kaam apna niyaz-mandi hai

hum bhi ai naznin samajhte hain

hum se uljhe na mohtasib hargiz

hum ki sab aan-o-in samajhte hain

ghair samjha hai la-makan jis ko

hum use dil-nashin samajhte hain

hum tere pyar ke hain da'wedar

KHud ko shayad hasin samajhte hain

ai 'amar' ye to jeb-o-daman hai

jis ko hum aastin samajhte hain