apna paband koi ghair bana le mujhko

apnā pāband koī ġhair banā le mujh ko

is se achchhā hai ki allāh uThā le mujh ko

jau kī roTī se maiñ rakhtā huuñ kuchh aisā rishta

raas aate nahīñ sone ke nivāle mujhe ko

aa.ine meñ nazar aatī hai bas apnī tasvīr

maiñ tirā 'aks huuñ ai dekhne vaale mujh ko

manzil-e-dil na.ī āvāz lagā detī hai

rokte haiñ jo kabhī paañv ke chhāle mujh ko

jab nikaltā huuñ maiñ ghar se to palaTtā hī nahīñ

gauhar-e-ashk huuñ āñkhoñ meñ chhupā le mujh ko

dil-e-majbūr ko maiñ ne bhī satāyā hai bahut

kahīñ allāh musībat meñ na Daale mujh ko

abhī mazmūn mohabbat kā mukammal hī nahīñ

yaad aa.e haiñ kitāboñ ke havāle mujh ko

gosha-e-qabr meñ taskīn kā sāmāñ hogā

kuchh na de pā.eñge duniyā ke ujāle mujh ko

chaar din ke liye aayā thā maiñ hastī meñ 'ra.īs'

maut se kah do ki vā'doñ pe na Taale mujh ko

apna paband koi ghair bana le mujh ko

is se achchha hai ki allah uTha le mujh ko

jau ki roTi se main rakhta hun kuchh aisa rishta

ras aate nahin sone ke niwale mujhe ko

aaine mein nazar aati hai bas apni taswir

main tera 'aks hun ai dekhne wale mujh ko

manzil-e-dil nai aawaz laga deti hai

rokte hain jo kabhi panw ke chhaale mujh ko

jab nikalta hun main ghar se to palaTta hi nahin

gauhar-e-ashk hun aankhon mein chhupa le mujh ko

dil-e-majbur ko main ne bhi sataya hai bahut

kahin allah musibat mein na Dale mujh ko

abhi mazmun mohabbat ka mukammal hi nahin

yaad aae hain kitabon ke hawale mujh ko

gosha-e-qabr mein taskin ka saman hoga

kuchh na de paenge duniya ke ujale mujh ko

chaar din ke liye aaya tha main hasti mein 'rais'

maut se kah do ki wa'don pe na Tale mujh ko