apna pata phaTi hui jebon mein Dal kar

apnā pata phaTī huī jeboñ meñ Daal kar

ghar se nikal paḌe haiñ balāoñ ko Taal kar

qātil haiñ rāste to safar hai lahū lahū

aao shugūn dekh leñ sikka uchhāl kar

samjheñ kahīñ na koī ajūba tujhe ye log

ġhurbat kī zindagī kā na itnā malāl kar

tārīkī-e-hayāt meñ gum vo bhī ho ga.e

chalte the rāsta jo bahut dekh-bhāl kar

ḳhūn-e-jigar se likkhī hai tārīḳh-e-ahd-e-nau

shā.ir ne sab haqīqateñ sheroñ meñ Dhaal kar

murjhā gayā hai terī judā.ī meñ naḳhl-e-dil

āb-e-visāl se tū ise phir nihāl kar

piite haiñ roz shab tirī furqat meñ sāqiyā

apnā shabāb sāġhar-o-mīnā meñ Dhaal kar

'parkāsh' merī laash ko kāġhaz kā de kafan

be-vaqt maut kā na tū itnā malāl kar

apna pata phaTi hui jebon mein Dal kar

ghar se nikal paDe hain balaon ko Tal kar

qatil hain raste to safar hai lahu lahu

aao shugun dekh len sikka uchhaal kar

samjhen kahin na koi ajuba tujhe ye log

ghurbat ki zindagi ka na itna malal kar

tariki-e-hayat mein gum wo bhi ho gae

chalte the rasta jo bahut dekh-bhaal kar

KHun-e-jigar se likkhi hai tariKH-e-ahd-e-nau

shair ne sab haqiqaten sheron mein Dhaal kar

murjha gaya hai teri judai mein naKHl-e-dil

aab-e-visal se tu ise phir nihaal kar

pite hain roz shab teri furqat mein saqiya

apna shabab saghar-o-mina mein Dhaal kar

'parkash' meri lash ko kaghaz ka de kafan

be-waqt maut ka na tu itna malal kar