apna sar apni hatheli pe sanbhaale nikle

apnā sar apnī hathelī pe sañbhāle nikle

zindagī yuuñ bhī tire chāhne vaale nikle

mash.aleñ tund havāoñ meñ chale haiñ le kar

tere ushshāq zamāne se nirāle nikle

saath chhoḌā na rah-e-shauq meñ āḳhir dam tak

kitne dam-sāz mire paañv ke chhāle nikle

tīrgī ġham kī baḌhī had se to aañsū ban kar

dil ke rauzan se umīdoñ ke ujāle nikle

ḳhūñ-bahā māñgte ham apnā to kis se āḳhir

jitne qātil the vo sab chāhne vaale nikle

pursish-e-hāl kī ummīd thī jin se 'nātiq'

vo bhī hoñToñ pe lagā.e hue taale nikle

apna sar apni hatheli pe sanbhaale nikle

zindagi yun bhi tere chahne wale nikle

mashalen tund hawaon mein chale hain le kar

tere ushshaq zamane se nirale nikle

sath chhoDa na rah-e-shauq mein aaKHir dam tak

kitne dam-saz mere panw ke chhaale nikle

tirgi gham ki baDhi had se to aansu ban kar

dil ke rauzan se umidon ke ujale nikle

KHun-baha mangte hum apna to kis se aaKHir

jitne qatil the wo sab chahne wale nikle

pursish-e-haal ki ummid thi jin se 'natiq'

wo bhi honTon pe lagae hue tale nikle