apna to KHair zikr kya koi nahin nigah mein

apnā to ḳhair zikr kyā koī nahīñ nigāh meñ

umr tamām ho ga.ī chhoTe se ik gunāh meñ

kis kā ḳhirām-e-nāz thā kaun thā ġham kī raah meñ

nuur sā ik chamak uThā qalb-e-shab-e-siyāh meñ

kaun samajh sake use rabt-e-nihāñ kī baat hai

husn kī har adā milī ishq ke ishtibāh meñ

terī nigāh-e-nīm-vā kaam to apnā kar ga.ī

kaif-e-davām de ga.ī kulfat-e-gāh-gāh meñ

dekho charāġh-e-āgahī rāh-e-junūñ meñ bujh gayā

aql ke hosh gum haiñ ab ek hī intibāh meñ

ek maqām hai jahāñ ek haiñ aks-o-ā.ina

ishq ko jā ke dekhiye husn kī jalva-gāh meñ

dekh rahī hai aaj bhī merī nigāh-e-garm-o-tez

chhupne ko chhup ga.e ho tum parda-e-mehr-o-māh meñ

mahfil-e-zīst meñ 'sabā' hogā nazar kā haal kyā

aag sī jab bhaḌak uThī qalb-e-junūñ-panāh meñ

apna to KHair zikr kya koi nahin nigah mein

umr tamam ho gai chhoTe se ek gunah mein

kis ka KHiram-e-naz tha kaun tha gham ki rah mein

nur sa ek chamak uTha qalb-e-shab-e-siyah mein

kaun samajh sake use rabt-e-nihan ki baat hai

husn ki har ada mili ishq ke ishtibah mein

teri nigah-e-nim-wa kaam to apna kar gai

kaif-e-dawam de gai kulfat-e-gah-gah mein

dekho charagh-e-agahi rah-e-junun mein bujh gaya

aql ke hosh gum hain ab ek hi intibah mein

ek maqam hai jahan ek hain aks-o-aina

ishq ko ja ke dekhiye husn ki jalwa-gah mein

dekh rahi hai aaj bhi meri nigah-e-garm-o-tez

chhupne ko chhup gae ho tum parda-e-mehr-o-mah mein

mahfil-e-zist mein 'saba' hoga nazar ka haal kya

aag si jab bhaDak uThi qalb-e-junun-panah mein