apne afkar ko jazbaat mein Dhaalo to sahi

apne afkār ko jazbāt meñ Dhālo to sahī

raah manzil ke liye koī nikālo to sahī

toḌ do baḌh ke har ik lab pe lagī mohr-e-sukūt

naġhma-e-soz ko phir saaz meñ Dhālo to sahī

sub.h-e-ummīd bhī ho shām-e-tamannā bhī rahe

aisā mausam koī āñkhoñ meñ basā lo to sahī

bin piye hosh meñ rahnā to bahut hai āsāñ

pī ke ab laġhzish-e-pā apnī sañbhālo to sahī

jis kī tā'bīr mohabbat ke sivā kuchh bhī na ho

ḳhvāb aisā koī āñkhoñ meñ basā lo to sahī

dur-e-nāyāb tumheñ ab bhī mayassar hoñge

bahr-e-zaḳhḳhār kī tah ko bhī khañgālo to sahī

apne afkar ko jazbaat mein Dhaalo to sahi

rah manzil ke liye koi nikalo to sahi

toD do baDh ke har ek lab pe lagi mohr-e-sukut

naghma-e-soz ko phir saz mein Dhaalo to sahi

subh-e-ummid bhi ho sham-e-tamanna bhi rahe

aisa mausam koi aankhon mein basa lo to sahi

bin piye hosh mein rahna to bahut hai aasan

pi ke ab laghzish-e-pa apni sanbhaalo to sahi

jis ki ta'bir mohabbat ke siwa kuchh bhi na ho

KHwab aisa koi aankhon mein basa lo to sahi

dur-e-nayab tumhein ab bhi mayassar honge

bahr-e-zaKHKHar ki tah ko bhi khangalo to sahi