apne ghar ka mujhe mehman bahut karta hai

apne ghar kā mujhe mehmān bahut kartā hai

merā hamdam mirā sammān bahut kartā hai

fikr 'uqbā kī nahīñ qalb meñ haa.e afsos

fikr duniyā kī ye insān bahut kartā hai

pārsā us ko maiñ kahtā huuñ kahūñgā har dam

apnī baḳhshish kā jo sāmān bahut kartā huuñ

sher-dil ḳhud ko batātā hai bashar vo lekin

ranj kam sahtā hai e'lān bahut kartā hai

jā baḌhā us kī taraf apnā qadam ab tū bhī

tujh se milne kā vo armān bahut kartā hai

haq kī bātoñ pe 'amal bhī to zarūrī hai miyāñ

chār-sū haq kā to e'lān bahut kartā hai

chāhtā jab bhī hai tadbīr se apnī 'nāzāñ'

hukmrāñ vaqt kā hairān bahut kartā hai

apne ghar ka mujhe mehman bahut karta hai

mera hamdam mera samman bahut karta hai

fikr 'uqba ki nahin qalb mein hae afsos

fikr duniya ki ye insan bahut karta hai

parsa us ko main kahta hun kahunga har dam

apni baKHshish ka jo saman bahut karta hun

sher-dil KHud ko batata hai bashar wo lekin

ranj kam sahta hai e'lan bahut karta hai

ja baDha us ki taraf apna qadam ab tu bhi

tujh se milne ka wo arman bahut karta hai

haq ki baaton pe 'amal bhi to zaruri hai miyan

chaar-su haq ka to e'lan bahut karta hai

chahta jab bhi hai tadbir se apni 'nazan'

hukmran waqt ka hairan bahut karta hai